मतदानाच्या कारणावरून दिव्यांगास मारहाण; मूर्ती येथील घटना, एका आरोपीविरुद्ध गुन्हा दाखल
मोताळा (बुलढाणा ) : तू कोणाला मतदान केले, असे म्हणून दिव्यांगाच्या पोटावर टोकदार वस्तू मारून जखमी केल्याची घटना मूर्ती येथे शुक्रवारी सायंकाळी साडे सहा वाजता घडली. प्रकरणी बोराखेडी पोलिसांनी एका आरोपीविरुद्ध गुन्हा दाखल केला आहे.
तालुक्यातील मूर्ती येथील भिकाजी रामकृष्ण धुरंधर (42) यांनी बोराखेडी पोलिसांत तक्रार दिली की, फिर्यादी दिव्यांग असल्याने त्यांना चालता फिरता येत नाही. दरम्यान, ग्रामपंचायतीच्या निवडणुकीसाठी शुक्रवारी मतदान झाले. मतदान आटोपल्यानंतर भिकाजी धुरंधर हे स्वतःच्या घरात हजर असताना, गावातीलच गणेश काशिराम इंगळे याने त्यांच्या खिडकीजवळ उभा राहून भिकाजी धुरंधर यांना तू कोण्या पार्टीला मतदान केले, असे म्हणून शिवीगाळ केली.
तसेच खिडकीतून हात टाकून त्यांच्या पोटावर टोकदार वस्तू मारून जखमी केले. सदर घटना शुक्रवारी (ता.15) सायंकाळी साडे सहा वाजताच्या सुमारास घडल्याचे तक्रारीत नमूद आहे. याप्रकरणी भिकाजी रामकृष्ण धुरंधर यांच्या तक्रारीवरून बोराखेडी पोलिसांनी आरोपी गणेश काशिराम इंगळे याच्याविरुद्ध गुन्हा दाखल केला आहे. पुढील तपास पोलिस निरीक्षक माधवराव गरुड यांच्या मार्गदर्शनात पोहेकाँ नंदकिशोर धांडे करीत आहेत.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.